(गोवा) हरमल :प्रतिनिधि
दिनांक :३० जानेवारी २०२५
वेंगुर्ला, सिंधुदुर्ग येथून गोव्यात पर्यटनासाठी आलेल्या मुलांना हरमल येथे बेदम मारहाण केल्याचा प्रकार घडला आहे. बुधवारी २९ जानेवारी रोजी घडलेल्या या घटनेत चारजण गंभीर जखमी झाल्याची माहिती समोर आलीय मांद्रेजखमींना सुरुवातीला उपाचारासाठी तुये येथील प्राथमिक आरोग्य केंद्रात दाखल करण्यात आले. त्यानंतर म्हापसा येथील जिल्हा रुग्णालयात त्यांना हलवण्यात आले. दरम्यान, उशीरा रात्री त्यांना पुढील उपचारासाठी बांबोळी येथील गोवा वैद्यकीय महाविद्यालयाच्या रुग्णालयात हलवण्यात आले. घटना समोर आल्यानंतर मांद्रे पोलिसांनी घटनास्थळी धाव घेत पंचनामा केला. तसेच, घडलेल्या घटनेची माहिती घेतली. पोलिसांनी दिलेल्या माहितीनुसार, वेंगुर्ल्यातून आलेले पर्यटक भोमा, पालिये येथे सार्वजनिक ठिकाणी उघड्यावर मद्यपान करत होते. यावेळी स्थानिकांनी त्यांना जाब विचारला. दरम्यान, यावरुन स्थानिक आणि पर्यटक युवक यांच्या शाब्दिक बाचाबाची झाली. याचे रूपांतर मारामारीत झाले. स्थानिकांनी पर्यटकांना बेदम चोप दिल्याचे समोर आले आहे. मांद्रे पोलिस या घटनेचा अधिक तपास करत आहेत.