दिनांक: १२ सप्टेंबर २०२५
सावंतवाडी: तहानेने व्याकुळलेल्या कुत्र्याने गणेश चतुर्थीच्या दिवशी प्लास्टिक बरणीतील पाण्यासाठी आत तोंड घातले आणि त्यात तो फसला. बरणीत अडकलेलं तोंड बाहेर काढण्यासाठी त्याने प्रयत्नाची पराकाष्ठा केली मात्र त्यात तो असफल ठरला. ग्रामस्थांनीही त्याच्या सुटकेसाठी प्रयत्न केले मात्र तो प्रत्येक वेळी ग्रामस्थांना पाहताच पळ काढायचा. त्यामुळे ग्रामस्थ ही हतबल झाले. अखेर तब्बल १७ दिवसानंतर बरणीत तोंड अडकलेल्या या कुत्र्याची रॅपिड रेस्क्यू टीमसह मंगेश तळवणेकर व स्थानिक ग्रामस्थांच्या सहकार्याने सुटका करण्यात आली.
गणेश चतुर्थीच्या दिवशी या कुत्र्याने पाण्यासाठी या बरणीत तोंड घातले होते. गेले पंधरा दिवस त्याने आपल्या परीने सुटकेसाठी अथक प्रयत्न केले. ग्रामस्थांनीही त्याच्या सुटकेसाठी प्रयत्न केले मात्र तो यात असफल ठरला.अखेर विठ्ठल रखुमाई शेतकरी संघटनेचे अध्यक्ष तथा माजी शिक्षण व आरोग्य सभापती मंगेश तळवणेकर यांना याची माहिती मिळताच त्यांनी वन खात्याच्या रॅपिड रेस्क्यू टीमचे बबन रेडकर यांच्याशी संपर्क साधला. त्यानंतर रेस्क्यू टीम व स्थानिक ग्रामस्थांच्या तब्बल दोन तासानंतर अथक प्रयत्नानंतर या कुत्र्याच्या गळ्यात गोल वायझर
अडकवून त्याला पकडण्यात आले. त्यानंतर बरणी कापून या कुत्र्याची सुटका करण्यात आली. यानिमित्त मंगेश तळवणेकर यांच्या भूतदयाचे कौतुक होत आहे. यावेळी मधुकर भाईडकर, भारत कोनापालकर, महेंद्र धारगळकर, वेदांत धारगळकर, राज भाईडकर, चिराग तोरसकर, साहिल कोनापालकर, संजय पांढरे, प्रणव भाईडकर, प्रमोद पांढरे आदी स्थानिक ग्रामस्थांचे सहकार्य लाभले.
दीपक गावकर