दिनांक: २१/०८/२०२६
बांदा: रक्षाबंधन हा भाऊ-बहिणीच्या प्रेम, विश्वास आणि आपुलकीचे प्रतीक असलेला पवित्र सण. या प्रेमाच्या नात्याला राष्ट्रप्रेमाची जोड देत देशाच्या सीमेवर अहोरात्र कर्तव्य बजावणाऱ्या वीर जवानांप्रती प्रेम, आदर आणि कृतज्ञता व्यक्त करण्यासाठी जिल्हा परिषद प्राथमिक शाळा घारपी येथील स्काऊट-गाईड व कब-बुलबुल पथकातील विद्यार्थ्यांनी ‘एक राखी सैनिकांसाठी… सीमेवरच्या भावांसाठी’ हा हृदयस्पर्शी उपक्रम राबविला.
विद्यार्थ्यांनी स्वतःच्या हाताने आकर्षक राख्या तयार करून त्या सीमेवर तैनात असलेल्या जवानांना पाठविल्या. देशाच्या सुरक्षेसाठी आपल्या कुटुंबापासून दूर राहून सण-उत्सवांचाही त्याग करणाऱ्या जवानांच्या कर्तव्यनिष्ठेची व त्यागाची जाणीव विद्यार्थ्यांना व्हावी आणि त्यांच्या मनात राष्ट्रप्रेम व देशभक्तीची भावना अधिक दृढ व्हावी, या उद्देशाने हा उपक्रम घेण्यात आला.
विविध रंगांचे व सजावटीचे साहित्य वापरून विद्यार्थ्यांनी मोठ्या उत्साहाने सुंदर राख्या तयार केल्या. प्रत्येक राखीत केवळ रंग आणि कलाकुसर नव्हती, तर जवानांविषयीचा आदर, प्रेम, कृतज्ञता आणि देशभक्तीची भावना गुंफलेली होती. ‘तुम्ही सीमेवर उभे राहून देशाचे रक्षण करता, म्हणून आम्ही तुमच्यासाठी प्रेमाचा हा धागा पाठवत आहोत,’ या भावनेतून विद्यार्थ्यांनी जवानांना राख्या पाठविल्या.
राख्यांसोबत विद्यार्थ्यांनी जवानांसाठी पोस्टकार्डवर स्वहस्ते मनःपूर्वक शुभेच्छा संदेशही लिहून पाठविले. रक्षाबंधनाच्या दिवशी आपल्या बहिणींपासून व कुटुंबापासून दूर असलेल्या जवानांना या राख्यांमधून देशातील चिमुकल्या भावंडांच्या प्रेमाची, आपुलकीची आणि कृतज्ञतेची जाणीव व्हावी, अशी भावना विद्यार्थ्यांनी व्यक्त केली. पोस्टकार्डवरील भावपूर्ण शब्दांत जवानांच्या शौर्याला, त्यागाला आणि देशसेवेला मनापासून सलाम करण्यात आला.
सीमेवर जवान देशासाठी जागत असताना, घारपीच्या चिमुकल्या हातांनी त्यांच्यासाठी प्रेमाचा धागा विणला. घारपीसारख्या दुर्गम भागातील विद्यार्थ्यांनी आपल्या छोट्याशा कृतीतून सीमेवर देशासाठी खंबीरपणे उभ्या असलेल्या जवानांपर्यंत प्रेम, आपुलकी आणि राष्ट्रभक्तीचा संदेश पोहोचविला. राखीचा हा छोटासा धागा प्रत्यक्षात जवान आणि देशातील प्रत्येक नागरिकाला जोडणाऱ्या विश्वासाचा, कृतज्ञतेचा आणि राष्ट्रप्रेमाचा धागा ठरला.
या उपक्रमामुळे विद्यार्थ्यांमध्ये देशप्रेम, सामाजिक बांधिलकी, सर्जनशीलता आणि जवानांविषयी आदराची भावना अधिक दृढ झाली. घारपीच्या चिमुकल्या विद्यार्थ्यांनी स्वनिर्मित राख्या आणि शुभेच्छा संदेशांच्या माध्यमातून देशरक्षणासाठी सीमेवर उभ्या असलेल्या जवानांना दिलेली ही प्रेमाची अनोखी भेट विशेष भावणारी ठरली.
या उपक्रमासाठी मुख्याध्यापक व स्काऊटर शिक्षक जे. डी. पाटील, तसेच सहकारी शिक्षक आशिष तांदुळे व धर्मराज खंडागळे यांनी विद्यार्थ्यांना मार्गदर्शन केले. विद्यार्थ्यांनी उत्स्फूर्त सहभाग नोंदवत हा राष्ट्रप्रेमाचा उपक्रम यशस्वी केला.